Brownie kaka uppskrift

1. Hitið ofninn í 180°C og setjið bökunarpappír í botninn á um 22 cm stóru smelluformi (hringformi). Spreyið það vel að innan með matarolíuspreyi.
2. Bræðið suðusúkkulaði og smjör í vatnsbaði og leyfið hitanum síðan aðeins að rjúka úr blöndunni.
3. Þeytið egg og sykur þar til létt og ljós blanda myndast. Hellið súkkulaðibráðinni saman við í mjórri bunu og hrærið varlega á meðan.
4. Næst má sigta hveiti og kakó og blanda varlega saman við og bæta saltinu saman við.
5. Að lokum má vefja saxaða rjómasúkkulaðinu saman við deigið með sleikju.
6. Hellið í formið og bakið í 35-40 mínútur eða þar til prjónn kemur úr með smá kökumylsnu á endanum en ekki blautu deigi.
7. Kælið kökuna alveg áður en þið setjið ganache og krem yfir hana.

Ganache súkkulaðibráð

1. Saxið súkkulaðið smátt niður og setjið í litla skál.
2. Hitið rjómann að suðu og hellið yfir súkkulaðið, leyfið að standa í um 2 mínútur og pískið síðan saman.
3. Hellið kreminu ofan á kælda kökubotninn og dreifið því jafnt yfir, leyfið að leka örlítið niður hliðarnar.

Frosting krem og draugaskreyting

1. Hitið sykur, sýróp og vatn saman í potti. Hitið að suðu og lækkið svo hitann, hrærið stanslaust í þar til sykurinn er bráðinn. Þetta tekur um 5 mínútur.
2. Hellið sykurblöndunni yfir í könnu og leyfið hitanum að rjúka úr í nokkrar mínútur, hrærið reglulega í blöndunni á meðan.
3. Stífþeytið næst eggjahvíturnar og lækkið síðan hraðann niður í hægasta á hrærivélinni.
4. Hellið volgri sykurblöndunni varlega saman við í mjórri bunu.
5. Þeytið síðan að nýju þar til stífir toppar myndast.
6. Bætið vanilludropum saman við í lokin og þeytið aðeins áfram.
7. Smyrjið um 1/3 af kreminu yfir botninn en ekki alveg út á kantana, skiljið eftir smá kant allan hringinn.
8. Setjið restina af kreminu í sprautupoka með stórum hringlaga stút (um 2 cm í þvermál) og sprautið drauga ofan á kremið.
9. Skreytið með því að setja tvö sykuraugu á hvern draug og kælið síðan kökuna.